Mat 13:1-15 | YomNWM | STEP | Mu lumbu beni, Yesu wutotuka mu nzo ayi wuyenda vuanda mu muenda mbu.

Matthew 13:1-15

Nongo yi nkuni

(Malako 4.1-9 ; Luka 8.4-8)

1 Mu lumbu beni, Yesu wutotuka mu nzo ayi wuyenda vuanda mu muenda mbu. 2 Nkangu wuwombo wu batu bayiza va kaba. Diawu kakumina mu nlungu ayi wuvuanda muawu. Nkangu woso wu batu wuba va disimu.

3 Wuba longa mambu mawombo mu zinongo. Buna wuba kamba :

—Nkuni wumosi wuyenda ku muanga mbongo. 4 Bu kaba muanga mbongo ^{▼▼muanga mbongo : Bayuda baba kifu ki muanganga voti lozanga zitheti mu thangu kuna.}; ndambu yibua mu ndambu nzila, zinuni ziyiza mana kuyidoda. 5 Ndambu yinkaka yibua va matadi ; vuma beni vasia ba ntoto wuwombo ko ; zitheti zivika mena bila ntoto wusia ba phiba ko. 6 Vayi muini wungolo bu wutotuka, mintuidila beni miyokana ayi miyuma bila mianzi miawu misia kota ko mboti mu tsi ntoto. 7 Zitheti zinkaka zibua va zitsendi. Zitsendi beni zimena ayi zifietikisa mintuidila beni. 8 Vayi zinkaka zibua mu ntoto wumboti ayi zibuta mimbutu miwombo : lumosi khama yimosi ; lunkaka makumasambunu ayi lukaka makumatatu. 9 Woso widi matu ma wila buna bika kawa.

(Malako 4.10-12 ; Luka 8.9-10)

10 Minlonguki mifikama ayi minyuvula :

—Bila mbi wulembo sadila zinongo mu kuba yolukila e ?

11 Buna niandi wuba vutudila :

—Beno lutambula diluaku di zabila mansueki ma Kipfumu ki Diyilu, vayi bawu basia kuma tambula ko. 12 Bila mutu wowo widi bima, bela kumvana ayi wela baka biwombo biviatukidi tezo. Vayi mutu wowo kambulu bima, wela ziono fiofi fidi yandi.

13 Diawu ndikubakambilanga mu zinongo bila balembo tadi vayi bakadi mona, ka diambu ko batembi makutu vayi bakadi wa ayi bakadi sudika. 14 Mavangimini bobo mu diambu di dedikisa mambu mbikudi Ezayi kabikula mu diambu diawu :

Wa, luela wa kueno vayi lulendi sudika ko.
Tala, luela tala kueno vayi lulendi mona ko.
15 Bila mintima mi batu baba miyikidi ngolo banga matadi.
Bamengi kuawu wa.
Bazibikidi meso mawu ;
bila nganu meso mawu malenda mona,
makutu mawu malenda wa,
mintima miawu milenda sudika,
bila nganu balenda balula mavanga
ayi nganu ndenda kuba belusa !